قصيدة ربعي بني خالد / للشاعر سيف السيف

بدر بن دهام  ربعي بني خالد



من مشرق ٍ تلقى به النور يا فْلان
من لابة ٍ سادت على كل الاسياد .. !!
ربعي بني خالد على كل شيطان
حنّا دحرنا الكيد من سود الاكباد
في ذكرنا .. يذكر هل الطيب باحسان
في ذكرنا .. ماتت تدابير حسّاد
الخالدي .. متقلّد الطيب نيشان
مذكور في سلم العرب عند الاجواد
ويوم الخلايق تلبس اللول والدان
الخالدي متحزّم ٍ .. باللقا قاد .. !!
سيف ٍ سبق كل القصايد على لْسان
فعل ٍ يصح لْسان .. والمجد ميراد
عْلومنا ترفع من القدْر والشان
فينا يتم العلْم كان الحكي زاد
يا ناشد ٍ عن موقعي بين الاوطان
اخذ الكلام الزين لا جيت نشّاد
لي بالجزيره عز .. تحفظْه الازمان
إن كان للتاريخ سيره وميعاد .. !!
بالطيب صيت الخالدي عند عربان
وان كان ثار غبارها .. ما له اضداد .. !!
حنّا حكمنا الشرق .. لين الثرى خان
حنا لنا مع مطلع النور .. أمجاد .. !!
فينا شيوخ ٍ خِلِّدو مثل الاركان
قد شيّدو للعز سيره وميلاد
من طاري الشرقي .. إلى قاصي عمان .. !!
من ساحل المشرق .. إلى دار بغداد .. !!
وان جيت دار الشام .. وان جيت عمّان
ومن يوم تشمل بالجزيره لنا بْلاد .. !!
كل الخليج ارضي .. وصيتي بها بان
وان كان دار الوقت .. وان راحت اجداد
وان كان بي حسره .. ترى الراس ما هان
اللي يروح يْروح .. والمجد ينعاد .. !!
حنّا نكوّن داخل الكون .. أكوان .. !!
لو يجحد التاريخ .. واحرار تنقاد .. !!
حنّا بني خالد على الروس تيجان
حنّا يمين الجود كان الزمن جاد
من لا عرفنا .. ما يثمّن بالاثمان
حنا هل الطولات في كل تعداد .. !!
مكتوب في قلبي .. وفي كل شريان
حنّا ( بني خالد ) شغاميم واسياد .. !!


سيف بن سلطان السيف الخالدي