#الوثيقه_الخالديه : للشاعر محمد القنيص الخالدي

 بديت باسمه واذكره حي قيّوم
واستغفره وارجع عن الذنب تايب
وامجدّه واعبده واطيح واقوم
ذليل لاجل العفو منّه وهايب
يالله ياعلم خفى كل معلوم
ملجاي لا صكّت علي النوايب
نرضى بمقسومك على كل مقسوم
يوم العطايا منك حظ ووهايب
من بعدها سر ياقلم واكتب اليوم
مادار في فكري وماكان غايب
واستحضر احساس وتفاصيل وعلوم
احداث تاريخ الاهل والعصايب
قال القنيصي يبدع القاف ملزوم
يومٍ بدع القاف جت له سبايب
اخترت لي من سلّة الشعر منظوم
ونقّيت منها كل جزلٍ وطايب
حنّا بني خالد سلالات مخزوم
لقريش يرجع اصلنا والنسايب
سيف الله اللي دكّ كسرى مع الروم
قص الصليب وهدّ ذيك اللهايب
حنّا شريفين النسب عِلية القوم
حنّاسنام المجد هِبْسْ النجايب
حنّا هل العليا سلاطين وقروم
حنّا هل الطولات عند الحرايب
كم من عدوٍ حاربت لذّة النوم
عينه وشاف بها البلا والغلايب
من قرن رابع بالتواريخ معلوم
مثبّتٍ بالكتب مابه شوايب
سليمان حاكم ارض بيشه مع تهوم
وبآل عمروٍ معطبين الضرايب
حنّا حمينا قبر طه ومعلوم
دوك البويهي راجعٍ منه خايب
والقيسريني يوم حطّين مزهوم
مع صلاح الدين سوّى العجايب
ويوم المغولي حاف بغداد ويزوم
تشهد لنا ضرب السيوف العطايب
وجمال مشهد والبطايح لها رسوم
تدفع لنا طيبٍ وتدفع غصايب
للشيخ عبد الله زعيمٍ وصاروم
شيخ الصبيحي والمنيعي قطايب
وابن عميره حاكمٍ هجر زيزوم
في قرن سابع يوم حشد الكتايب
زاح العيوني عن شداد الحسا يوم
كِتْبَتْ له سهوم النصر والكسايب
والمغامسي وجروان مالحقهم لوم
على سلفهم حاثّين الركايب
وابن جبر في قرن عاشر له رشوم
ثبّت رسوم الحكم وقت الصعايب
شريف مكه يوم صكّوا به القوم
فكّ الشريف ولا حسب له حسايب
ونَبهان يمّ عمان والمسلّمي كوم
يمّ الزباره والحسا والحدايب
وحميد حرٍ له فعايل وقاصوم
حَكَمْ مِيَه مع اربعينٍ كلايب
باسٍ شديد وللكرم حاضرٍ دوم
والكوت يشهد غير ذيك الوهايب
حنّا حكمنا ايران عربان وعجوم
بصوغيّةٍ ونصور رِحم وقرايب
وقصر القريشي في سكاكا له رسوم
يشهد له التاريخ يوم النشايب
والبرتغالي هاله ان كيف بنعوم
سقيناه مرٍ فوق ذيك الخشايب
وامّا القطيف امره موضّح ومحسوم
قطيفه المخزوم بنّى النصايب
بنى بها قلعه مع حصون ودعوم
وكسبت نداها من قطيفه كسايب
من الشام للموصل الى هضبة كروم
لعمان وحدود اليمن والهضايب
من اطراف مكه للعسيله مع احزوم
نجد العذيّه لارض فارس قضايب
ماجت لنا هدوٍ ولا بحبّة خشوم
الا بسوق اعمارنا للجلايب
قولٍ وفعلٍ لا خيالات وحلوم
ماهي بهرجة مدركين الكذايب
وقَدْر القبايل عندنا دوم محشوم
افعالهم تعجبك عند النوايب
وصلاة ربي عد ماتمطر غيوم
على النبي واعداد نبت العشايب
#الوثيقه_الخالديه
للشاعر:محمد القنيص الخالدي
@khalmsk: