الشاعر طارق السهيان ~ في الشهيد عبدالله السهيان

 نعزيكم ونعزي أنفسنا
ونسأل الله الكريم رب العرش العظيم أن يحشره مع النبيين والصديقين وأن يلهمكم الصبر والسلوان

أبيات كتبتها في الشهيد البطل :
يا ناشدن عنا ترى جاك مندوب
وافي وكافي ينقل العلم عنّا

عبدالله اللي راح وسهيل له صوب
يم اليمن فزعه ولا هو تونّا

الضيغمي ابن البطل ماهي كذوب
حرن شلع من ماكره ما استكنّا

الليث والضرغام من حر منجوب
وذعار عدوانه بحنكه وفنّا

انا اشهد انه بالوغى ماشي دروب
والحرب دارسها وفيها تغنّى

حنا ولدنا كان للحق مجذوب
ودون الوطن طعم الشهاده تمنّى

والكل منا شاف وش كان مكتوب
باخر رساله قال "نفدي وطنّا"

الله اكبر والقضى حق مطلوب
عن كل عين وسن عينن وسنّا

الحوثي الحوثي عن السلم محجوب
وأرض اليمن ما يوم فيه يتهنّى

يتوب فاسق بس عفاش ما يتوب
الخاين الغدار ما هوب منّا

يا دار لا تبكين فقدان محبوب
واتزيني يا دار باطياب حنّا
يا امه ترى ما مات بكتاب مكتوب
بدار الكريم يعيش واخير منّا

يا امه ترى لابس من العز له ثوب
وفوق الطوال رجوم فخره تبنّا

ويا اشبال عبدالله ترى العز مركوب
خوذو من الوالد دروسن كفنّا

علمه رفع راسي وبالمجلس طيوب
عز الله انه خير مندوب عنّا

شعر: طارق بن عبدالله بن مشعل بن ندا السهيان