#قصيدة الشاعر حسن بن فهد آل طلحاب العقيلي الخالدي #وقت الضحى كنه غدا بآخر الليل

دهام الرطبي #قصيدة الشاعر حسن بن فهد آل طلحاب العقيلي الخالدي #وقت الضحى كنه غدا بآخر الليل
#قناة #بني_خالد https://youtu.be/MHx40X4ekeE

وقت الضحى كنه غدا بآخر الليل
حتى لو ان الشمس بين شعقها
نمسي ونصبح بالصدور المداهيل
سبحان منهو بالمشاعر خلقها
شيٍ مسح ذكره وذكره تساهيل
والبعض لآخر وسط قلبي علقها
يالله عسى روضٍ ظما فاله السيل
العشق ضاع وضاعت اللي عشقها
ياويش عذر اللي سقى حالي الويل
غصة بقت والحلق فيها شرقها
وش عاد ضرك لو عدل مايل الميل
نقنع بخبزة بر معها مرقها
يقطع مواصل لو قطع يقطع الحيل
والله حسيب اللي ختلها سرقها
نقدر نعيل وناخذ الكيل بالكيل
ما عاد تدري برها من حبقها
ويبان لك لامن قدح حافر الخيل
خيالها يجدع برمحه زرقها
اي والله اللي بان في الحط والشيل
منهو يباريها ومنهو فهقها
ياهل المعرفه وش دوا زاير الغيل
يمشي على سكه ويخشى زلقها
بعض الدروب أركت علينا البهاذيل
ملزوم نسلكها لو الله محقها
ياليت نسلم من طروش المداخيل
نعرف نرتب رسمها مع نسقها
تسارعت الاحداث علم وتجاهيل
والشمس بين في سمانا شفقها
والليل مسرى للرجال المشاكيل
متخالطٍ ضو القمر مع غسقها
نسمع عوا ونباح كله تهاويل
ماعاد ندري ذيبها من سلقها
واطى برجلي ما نهاب المخاتيل
طرقٍ خلاويه ولاحدٍ طرقها
تبرق وترعد في سمانا مخاييل
واتبع ندا روحي لونَّه رهقها
نركض ورى الاحلام ضيم وتعاليل
والمشكله لاحلام محدٍ لحقها
علّ وعسى نجني ثمار المحاصيل
حظي كما صخرة، عسى الله فلقها
ولاَّ بجر الصوت عذب المواويل
آمنت بالقسمه، وربٍ فرقها
واللي قضى ربي فلا فيه تعديل
واللي تبا الراحه عسى الله رزقها
نقرى كتاب الله تدبر وترتيل
نرجي من المولى يحلل حلقها
سبحان ربي والله أكبر وتهليل
سبحان محصي نخلها مع ورقها
صلوا على محمد صلاةٍ بتبجيل
ودعوا الولي يارب نَقْطع سبقها



✍️ / حسن بن فهد آل طلحاب العقيلي الخالدي
سناب /hfmtk