ياذيب للشاعر خالد الدليهي

 باذيب لا تجفل من الذيب ياذيب
خابرك ذيب ٍ ماتهاب الذيابه

خابرك تقنب في طويل المراقيب
وبين الذيابه لك وقار ومهابه

ياذيب ما يلحقك شكٍ ولا ريب
وانت الفطين وفيك عرف وذرابه

انا اعدك لي من ادنى الاقاريب
لو كان مابيني وبينك قرابه

شهم وكريم وباخصٍ بالمواجيب
والطيب ورثن ٍ لك ولا به غرابه

بيني وبينك طيب وامزارق الطيب
وجرحتني والجرح مكّن صوابه

اتشوفني واتصد ياذيب ذا عيب
صدتك وسط القلب مثل الحرابه

ماجاك مني غير كثر التراحيب
ولا صار من بيني وبينك امجابه

وان كان جتك اعلوم راع العذرايب
وصدقتك نقال الحكي والزلابه

جعلك تهنابه وانا كاسب الطيب
والذيب ذيب ٍ ما يهاب الذيابه

خالد الدليهي..

رابط القصيده كامله في قناة بني خالد الرسميه على اليوتيوب

https://youtu.be/N1io5aksXnM