#قصيدة #ياحسافه #حسن #الطلحاب #العقيلي #الخالدي.

جابر الضويحي . ******** ***** قصيدة ياحسافة


ياحسافة ظن منهو قد تهقوى في يمينك
*ساريٍ ليله على نورك ويرقب للصباحي

يقطع افجوجٍ بعيده والمشقه لأجل عينك
** وأثرها راحت كما طيرٍ غدا منا وراحي

حارت أفكاري وقلبي ياعيون الريم وينك
وين وعدك وين عهدك صارت احلوفك مزاحي

يا سرابٍ قد تبعته جف نبعي في يدينك
ولمفارق يا ظنيني مثل طعن بالرماحي

لا تَهَيَّضْ جرح قلبي قلت ياربي يدِينك
عد ماهلت دموعي عد ما هبت رياحي

وان ذكرت أنه غصيبه قلت ياربي يعينك
والله يرزق من تسبب بالغبينه والنياحي

* مشكلةقلبي يحنه لاطرى دلك وزينك صرتي
** سجني في زماني ياعسى يطْلَق سراحي

كل ما هميت ابنسى مالقيت إللي يشينك
يالهنوف إللي بلتني واكتوى قلبي وفاحي

في منامي شاف قلبي فارسٍ فزعة يمينك
قال ياالنشمي توجه واسلك ادروب النجاحي

اترك الدنيا وهلها تاليتهم وارثينك
وانحر اديارٍ خليه كودها تبرى الجراحي

ثم سنَّد صوب شفك في كهوفٍ عارفينك
انص شيخٍ لو تعزوى قام ربعه بالسلاحي

قال سالم لا يهمك دامني جنبك عوينك
نركب امهارٍ اصايل تسبق اللي له جناحي

وان بغيت الجادل الشقرا فحنا مشترينك
بنت شيخٍ من كسبها فاز قلبه واستراحي

قلت سالم لابكيتك في الشدايد ذاخرينك
والعطى موفور وانتم طيبكم في الجو لاحي

قال سالم في ظروفك يالسنافي عاذرينك
أسلم وسلم على اللي خوته عذبه قراحي

أكرم الله ربع سالم في اللوازم معحبينك
بيض الله وجه شايب قام لأجلي ثم طاحي

هذي الدنيا عجايب والمحبه لا تهينك
المعزه راس مالك والتقى راس الفلاحي

يالله إنا عند بابك ياملاذي طالبينك
اسعف القلب المعنَّى بالعطايا والسماحي
********
بقلم /حسن بن فهد آل طلحاب العقيلي الخالدي
يوم الخميس 1‪440/1‪1/2‪2
سناب /hfmtk
****