على جرف الواقع الشاعر عبدالله خالد الخالدي

 #شعراء_بني_خالد
الشاعر عبدالله خالد الخالدي
على جرف الواقع
في منتهى الذوق قالت انت عبدالله؟
قلت ايه : عبدالله اللي رايحٍ فيها

قالت قصيدك حلو يا ليتك تشلّه!
قلت العفو صوتي اقشر كيف اغنيها

يا مرحبا بك وشكل اليوم ذَا فلّه
إرخي لي كفوفك الّا آقول : هاتيها

خليني آطير بك هذا الزمن كلّه
محتاج للّي تعوّضني واداريها

قالت تبيع القيم؟ قلت انتي مظلّه
لا والله اني بعد لقياك شاريها!

قالت لي اخوان ما يرضون ب الزلّه
قلت وحياتي بدونك وش معانيها

قالت لي عيال عمّ !! وقلت : لي ملّه
ماني معاهم بَحَسِّبْ ويش تاليها

قلت الهواوي عمى! لامن حضر خلّه
قالت عيون البشر ربّك يشافيها

قلت اقربي يا فديت الطول والطلّه
فرصه ولاني مصدّق وين ألاقيها
قالت لي الصبر طيّب قلت به علّه
مشاعري يوم جيتي كيف ابخفيها

قالت لي الحق!! قلت الحق وندلّه
قالت لي العيب قلت الروح يكفيها
قالت ترى مجتمعنا خيمه ودلّه
وعادات تتعب معاها وانت راعيها

قلت انسي الهم وارض الشوق مبتلّه
تعالي نعيش ساعه في روابيها

قالت بلاد العرب يا شين محتلّه
قلت العروبه ما ندري وين اراضيها

هذا يغنّي وهذا يجمع الغلّه
وهذا امتهن كذبه وهذا يمشّيها

وهذا ورى الموتر وهذا ورى الفِلّه
وهذا ورى الكوره وهذا م يبغيها

وهذا ورى الموضه وهذا شكى الذلّه
وهذا خمد فتنه وهذا يصحّيها

وهذا يغازل بذيج وهذي اتّتلّه
وهذي تنيشن على هذي وتخطيها
وصدور متفكّكه وعقول مختلّه
وقلوب متباعده وعيون تبكيها
وهْناك ثلّه ، هنا ثلّه ، هنا ثلّه
سوالفٍ ما فهمنا وش مغازيها

كثر الفتاوي تخلِّي الخلق معتلّه
حتى تعاليم الاسلام ومباديها

ما بين داعش وتكفيري وحزب الله
تَشتُّت اكثر عربنا في مساعيها
باسم الجهاد استباحوا دمّنا شلّه
ما نجهل اهدافها ولّا تماديها

قالت لي المشكله من تيه أو قِلّه؟
قلت المشاكل كثيره ليه اسمّيها
إما رجعنا لدرب الدين والملّه
ولّا ب نبحر ولا نلقى موانيها
قالت ودمعي انا استأذنْك بآهلّه
قلت ابكي احوالنا دامك عرفتيها

#عبدالله_خالد_الخالدي