#يامحمد لا تشقى #بالجبال #الشاعر #تيسير_بن محمد الدرعان

محمد الناعم يامحمد لا تشقى بالجبال
الجبل ما فيه فود ومنفعه

وش تبي به كان مالك به ظلال
المقفي لا تحاول تتبعه

ما أحدٍ كامل ولله الكمال
لا تضايق ياولد وانت بسعه

لا تمنى شي وصلك له محال
ولا تناظر جيل ضايع وأمعه

إدرج الرجلين بدروب الرجال
والكلام الزين حاول تسمعه

لا تفوت للكرم يابن الحلال
لا تحسبه حال.. بس اللي معه

بعضهم أكرم من مزون الخيال
للمسير باب بيته شرعه

وهو فقير وحالته بالفقر حال
بس فقره مارثع به وأمنعه

لو جيوبه ماجمع فيها ريال
الكرم يتعب عليه ويجمعه

الكريم معان من رب الجلال
كل شيٍ له مفاده وسنعه

لا تماشي غير وافين الخصال
لا تنزل قدر صاحبك ارفعه

ان غلط صاحبك يا محمد وعال
اتركه وأيام عمره تردعه

ولا تكثر يامحمد بالجدال
من دعا لهروج غيْابك دعه

احرص احرص يا محمد للجزال
الصلاه ودمك احذر تقطعه

الكبر للرجل من شين الخصال
يهلكه وأسباب ربعه تقطعه

لا تخلي للمناقد لك مجال
سايمك بالليل من صبحك بعه

أضبط الاقوال وقت الانفعال
وستر ربعك لا تحاول تجبعه

لا تضايق بالحكي عمٍ وخال
هم ذراك وهم وفاك ومنبعه

لاغديت بعين غالينك مثال
احذر اللي مايفيدك تتبعه

لاهرجت الهرج خله بإعتدال
خل من يعمي عيونه بصبعه

لا تجيب خبال لا ترضى الخَبال
ماتمد إيديك بكره تشبعه

ولاخذيت اللي عطيتك بالمقال
كل رايٍ تقتنع نفعه طعه

#تيسير_بن محمد الدرعان

1439/10/5