#جديد #الشاعر #ناصر #حمد #الضاحي

دهام الخالدي ان طعتني خل السياسه اتولّي‬
غارن بلاه الله بكثر الخفافيش

واللي حصلّك والله انه حصلّي
الراس منداش وعلى الفكر تشويش

لكن قلّي يا ابيض الوجه قلّي
وش رايك انبل العروق المعاطيش

نبغي نسولف بالطيور وعن اللي
تخلّي القناص كن ضاربه فيش

ربدن على روس النوايف اتفلّي
واحذر من المجرم ليا شاف تفتيش

وياك طيرن للمقافي يهلّي
هلّاي قرمن ضايفينه مداغيش

لا تل سبقه كن قلبك يتلّي
تلّت شجاعن ما براسه عراميش

وإن طار ما عداك راس المطلي
يلعب عليها والسما ممتلي ريش

واليا خلص لعبه وهو امتعلي
حوّل عليها يدرج الراس بشويش

واليا علق تقول ضابط مضلي
هو الوحيد اللي تبرع من الجيش

لا حول وجيته عليها امغلي
حذفت بالغتره من الزوم والطيش

هذي علومن يا السنافي اتسلّي
واخير من هرج الخبوش الدراويش

واخبار وارد عالمي ومحلي
وهذا ذبح هذا وهذا قطع ليش

يا صاحبي خل السياسه اتولي
واسعا ورا الستر ورا لقمت العيش

الشاعر: ناصر بن حمد الضاحي
رابط الفيديو على #قناة_بني_خالد

https://youtu.be/HiKOPDSGF4U