ابيات مهداه للاخ عبد الحكيم الخليوي الخالدي من الشاعر سالم السرحاني

جابر الضويحي ابيات مهداه للاخ عبد الحكيم الخليوي الخالدي من الشاعر سالم السرحاني

يبين علم الحيا والطيب علمه يبين
والغانمة كايدة ودروبها كايدة

يسعى لها كل رجّالٍ طليق اليمين
يتعب ل كسب النعم ، والا وش الفايدة

يمشي على ما سبقهْ جدوده الاولين
يا طيب راس الوفيّ وطيب بدايده

عبدالحكيم الخليوي لا أدلهمّت يبين
ولآني أجامله بالهرج واحايده

ظهر ب يمناه ، والدنيا تشين وتزين
وان زاد حمل الليالي همّته زايده

حقه علي امدحه ما دام فعله سمين
ماني بمادح ضعيفٍ همّه المايدة

لا عاون ب خير بالدنيا ولا هو يعين
الا ليا من هرج تبين حقايده

والا الخليوي فعوله تبهر الناظرين
قدايمه كلها وابداع جدايده

لو الحيا ب الجدي والا على الفرقدين
يجيب علمه ونفسه بالولع رايده

ما جاء ب شهرة ردى وسخافة متابعين
عوايده تحكمه يا طيب عوايده

قطع الفرج عادتك ما بين حينٍ وحين
من فوق جيبٍ ما ضريته على السايدة

وعلومك الطيّبة ومعاشر الطيّبين
ثنتين ما فيهن مساوم ولا مزايدة

يا صاحبي لا يهمك هرجة الشامتين
المرجلة كايدة ودروبها كايدة

خذني ب يمناك سيفٍ لك يا ذرب اليمين
صاحبك يفداك في ماله وقصايده

على الوفا ب العفا وان زاد جور السنين
نفوسنا للخوي وقت اللزم ذايدة


#سالم السرحاني

https://youtu.be/rxiU8MYV5jI