#الوقت مدرسه #عبدالله_الضليعي_الخالدي

 #الوقت مدرسه #عبدالله_الضليعي_الخالدي
.
"الوقت مدرسه"
الوقت هذا مدرسه بلا شنط ولا كتب
مشرعّه طول السنه للعالمين ابوابها
متفاوتين الناس فيها بالمراتب والرتب
هذاك يمدحها وهذا لا ذكرها عابها
ما تعلمك بالطيب لكنها تعلم بالغصب
ولا يفيدك درسها لو ما يعضك نابها
قليل من فيها نجح كثير من فيها رسب
وأنا تمرست ووعيت احسابها واعرابها
اخفيت ما عانيت واستبسلت صابر محتسب
والله على الدنيا كفيل الخلق يوم حسابها
في كل يوم تجيك باللي تحب واللي ما تحب
ما دمت فيها حي لابدك تشوف سنابها
الصدق سلعه كاسده والسوق كله للكذب
لواسفا يا اهل المبادي هالبشر وش صابها
بعض العرب مرّه ولا تبرّه واخذ بيته مطب
ابعد عن الشجره ولا تآمن عقوبة دابها
من عادة عيال النسا ماهم يثنوّن الركب
لازم يردون الطلب لأم الحجل وخضابها
الرجل تعرف وقفته بالضيق والوقت الصعب
والا الرخا كلن يقول انا لها و اولى بها
واحذر قليل الخاتمه يطرحك بحبال النشب
واياك لا تستفزعه لو قال انا عرابها
لو تدخله في مشكله يزيدها شبوب وحطب
والوقت ما يرحم رجالٍ ما تعرف اصحابها
فجالد مصاعبها واذا عزمت فأتبعها سبب
المسلم الكيّس فطن يبذل ولو يبلى بها
"المرجله ماهي بكبر الجسم والا بالشنب
دوك الجبير الصيرمي ليثن يهز كلابها"
واثنين لا تآمنهم بحالة رضى والا غضب
صنفين لا يخدعك لين اسلوبها وخطابها
الحاسد اللي يدعّي بالحب وقمه فالأدب
والمبغضين اللي حقدها من تحت جلبابها
راعي الحسد ما يغني عن مالهُ وما كسب
ما غيرت اهل القلوب السود بيض ثيابها
دنياك راحتها تعب واحوالها كلش عجب
ما اهبلك ياللي تجذبك وتظن حزت اعجابها
هاذي نصيحه عابره ولاهي مشاريه وعتب
يالله ترحم من وعاها وقلب من وصىّى بها
وصلى وسلم على المبعوث بلسان العرب
اعداد من طاف وسعى في مكه وصلى بها
#عبدالله_الضليعي_الخالدي
#شعراء_بني_خالد
#بني_خالد