قصيدة إهداء إلى ابن العم الشيخ: علي بن راشد العقيلي الخالدي.

دهام الخالدي قصيدة إهداء إلى ابن العم الشيخ /علي بن راشد العقيلي الخالدي.

صوت لي الداعي و في الحال فزيت
فز الفهود اللي تحامي ولدها
من فرحتي رحت المنادي ولبيت
يافرحت الخاطر ولذة سعدها
قربتنا المركا وعليها تمركيت
دعيتنا قافي لتكدح زندها
يكفي فخر للشعر والقاف والبيت
أنه لابو راشد لطيبة سردها
علي يابن راشد تجملت واوفيت
فعايلك بيضاء وكلٍ شهدها
يشهد لك التاريخ يا طيب الصيت
ودعاك للضيفان كلٍ حمدها
يابن العقيلي قلي وش عاد خليت
حزت العلوم الغانمة في مهدها
إي والله اللي يا علي قد تعليت
روس الرجوم اللي رفيعٍ امدها
يالنادر الشغموم في وصفك ازريت
تثبت على القمة وتثبت عمدها
يكفي لنا نوماس لا من تعزويت
بعزوة بني خالد ولا احدٍ جحدها
ياليتني بسمك علي قد تسميت
ويا حظ بطنٍ تفتخر بك ولدها
حتى الكرم يشهد جزايل قد اعطيت
جزايلك تغني جموع وبلدها
تعطي بليا قول عطني ويا ليت
مثل المزون اللي صدوقٍ رعدها
شيخٍ على ساس المراجل تربيت
قولك كما شيكٍ مصدق سندها
حتى الصعايب من طناختك فكيت
تخطم خشوم اللي شبكها وعقدها
تدري يابو راشد على الله تمنيت
يطيل في سنينك ويضعف عددها
حييت يالنادر ومليون حييت
بحر الصعايب منهو غيرك وردها
حنّا ترى ربعك ودرعك ليا بغيت
فزعة ولا يهمك تقدم وقدها
حنا بني خالد حزامك ليا ادعيت
أهل السموت اللي قويٍ جسدها
حنا هل الحيزا وهبس وهل البيت
كبار البيوت اللي ثبوتٍ وتدها
يالخالدي ياكم قرمٍ قد افنيت
يا كم شيخٍ من فعولك هجدها
ياكم شيخٍ وسط كبده قد اكويت
جمع الخوالد يزري منهو صمدها
وعذر وسموحه ياعلي كان ما اوفيت
قدرك كبير وهذي نفسي وجهدها



بقلم الشاعر/حسن بن فهد بن محمد آل طلحاب العقيلي الخالدي
سناب /hfmtk
بتاريخ ١٤٣٨/٥/١٤ هـ