مساجلة بين الشاعر محمد الحمالي القحطاني والشاعر ماجد الزيد الخالدي.

جابر الضويحي مساجلة بين الشاعر محمد الحمالي القحطاني
والشاعر ماجد الزيد الخالدي.

بقول الشعر في حضرة زعيمة
وقيفاني عساها مستقيمة

أرددها عن المنهاج كني
علا سابق ولا ترضى هزيمة

زهاها الطوق ايضا و القلايد
وفيها عن خيار الخيل شيمة

اقدمها لكم لو هي هزيلة
تسمنها العلاقات القديمة

يابن خالد ومجد ما يضاهى
وبذر الجود ياتي بالغنيمة

بني مخزوم يا نعم السلايل
تحدر من كنانه بن خزيمة

وأحفاده لؤي هو وغالب
بنو فهر وانساب عظيمة

جمعهم مع كريم الخلق منسب
ويكفيهم بأعلى الفخر قيمة

ولا ننسى فعولن للخوالد
فعولن دارسة ماهي سقيمة

بعد ذَا يا زمننا ويش باقي
ظهر خافي وضيعنا الخريمة

دفن سافي الزمن جملة اثرنا
وتهنا في رجاء سيل وديمة

وخوفي من مقابيل الليالي
دخيل الله من خطوى صريمة

عباد الرب ترجي من ثوابة
وتخشى من عذاب في جحيمة

وهذا الوقت ظني في مذلة
تساوت بِه رجاله مع حريمة

ولا ودي افصل في كلامي
لكم يا حر اوصافه عديمة

محمد الحمالي



هلا باهل التواريخ العظيمة
عوال العود وانفسهم كريمه

هلا بخيالة العرفا ليا من
بدى دعك المنايا مستهيمه

حماليه لهم بالكون الاغبر
رحى تطحن قويين الشكيمة

ليا عد العرب سبع القبايل
فقحطان الفخر وهم المشيمة

سلامي يالحمالي لك مدبّل
سلامي النود لك ساقه بغيمه

يابو سليمان وقت الدون هذا
مخلي ليثها الحصني غريمه

زمانٍ ابن كلب ولا يشيّم
وقول الحق به غادي جريمه

لك الله يالحمالي كل ما اطنا
شكى قلبي لقبر سعدون ضيمه

واذا مريت جوده في مسيري
يحمي ترابها دمعي حميمه

زمانٍ حط للحصني مسوبع
وذيب البيد سهران بحطيمه

زمانٍ فيه للخاين سياده
وامين الناس زاوي له بخيمه

زمانٍ فيه نسل الليث واقف
على باب الثعل يرجى الصتيمه

ونا بيني وغاياتي معارك
وبيني والثعل لطم اللطيمه

زمانٍ فيه برج وفيه كعبة
قوي البرج والكعبة يتيمه

زمانٍ فيه مركز للامارة
ولا للبدو من نزل ٍ تقيمه

زمانٍ فيه رخصة واستماره
ولا للخيل من يذبح تميمة

زمانٍ فيه لهريش المغازي
وكسبه من سناباتٍ ذميمه

زمانٍ شيّخ الفسل المنافق
وهو وقت اللزز كنّه حريمه

ونا شفت بمنامي قريش جدي
يصوت لي واظن اني كليمه

رجاي الله وورعٍ تو بيّن
عسى باوسط زمانه لي غنيمه

ماجد الزيد الخالدي.