شرفة الاحلام : الشاعر عبدالله بن خالد الخالدي

 شرفة الاحلام

تضيع كل السوالف في حضور القصيد
مثل الفرح في متاهات الحزن لا فرق

واللي همومه تشدّه دوم ايدٍ بإيد
أبداً لا تاخذ عليه ان ضاق ولّا حمق

وانا يا حزن الليالي قلت هل من مزيد
صدري وطن والوطن ما هاب خمش التفق

لو الرسايل تجي من دون ساعي بريد
ما مات مضمونها لكنّ شبه انخرق

قانون الاشواق في رجوى وليفٍ بعيد
يرقب على شرفة ايامه بحلمٍ بسق

يا ابعد من الشمس واقرب من ظْلال ووريد
شف صاحبك في غيابك كم بابٍ طرق

غنّا على راية الحب السقيم النشيد
وصدوف الايام تلعب به وطيفك برق

قلبٍ وفا لك حرام انك تبيعه زهيد
شوف الصحاري ولو تقسى تجيب العبق

مات الحسين بغدر واللهْ يحاسب يزيد
والله يعين الطلق من راميين الطلق

وانا رجل ادري ان الموت حقٍ أكيد
العمر محسوب والخفّاق دايم صدق

اخاف لا متّ في حبك فلا احسب شهيد
وامسي ضحية عشق واللي سبقني لبق

ما سافر الضحك من وجهي لأَنِّي وحيد
ولا تساقط ثمر وجدي وباقي ورق

ما جيت ادورْك باكوره وعزمي حديد
ولا تجنّبت بحر الياس لجل آغرق

ما جيت اداوي قديم الجرح دون الجديد
ولا مدوّر دفى لان الخفوق احترق

صحيح في غيبتك ضحكي مثل يوم عيد
عرفت وش قيمة الاحلام عقب الأرق

واللي مفارق حبايب أشهد انه طريد
وعرفت في عتمة الايام ويش الشفق

اللي يجيد الهوى ما آظن كرهك يجيد
واللي رشقه المطر ما هو يمش العرق

سرقت قلبي وانا ما جيت لك لجل اكيد
وبحكم الاسلام تقطع يدّ من هو سرق

#عبدالله_خالد_الخالدي