#الفية_الخالدي

الشاعر الفية الخالدي

قصيدة الشاعر / خالد بن علي بن سعيد الخالد الخالدي

ألف(ن)_ ابكتـب مايـقوله الِـساني
واجــيـب كـل الـنـادرت الــثـمـانـي
امـوثّــقـه ، ومـسـطّــره بـاتــزانـي
فـيـها الـجزالـه والـمعاني الـثقـيله
"
ألبأ_ بـلاي أنـي مـع الناس طـيّب
أسـامـح الـمخـطي واعـده قـريّـب
طيـبتْك يـالـنـشمي تـراهـا تـشيّب
بـعض العرب ما يـعرفون الـجميله
"
الـتا_ تـرى دورات الأيـام عـجـله
ويـن الـقلوب اللي مـن الله وجـله
اللي من التقصير والذّنب خجله
ماتنحني ل ابليس اُ لا ترتكي له
"
الثا_ ثمن بعض "الخطا" ما يقدّر
كم واحـد(ن) فـالطايله قـد تصدّر
مـن غلطتـه قـام إيـهـوي وايتحـدّر
مـا قـالـه السانك لـزوم ان تـشيله
"
ألجيم_ جـرح الخل ماهـو بـيـبرى
أهـل الـهوى والـحب اعـلـم وأدرى
ياسـاهـراً والـلـيل يـضـويه بـدرى
احـذر تـرى اسهوم المحبه صقيله
"
الحأ_ حـبـيب(ن) ما يـقـدّرك خـلّه
عـيـشـة فـقــيـر ولا غـنـاه ابـمـذلّه
كـلن ولـه قـسمه ، ويـعـرف محلّه
لا راح خل(ن) عـاضك الله بـديله
"
الخا_ خـساره فـالـمـقفي التفاته
نسيانه الـواجب ( وهـذي جزاته )
والله يـعـظم اجـركـم فـي مـماتـه
ويـجيركم ياهل " القلوب العليله "
"
الدا_ دقـايـق بـيـنـك وبـين رَبّـك
تـبري هـموم الـقلب وتزيد حـبّـك
بِيديه ضيقك ، داك ، بِـيديه طبّك
ويـحب عبد(ن) دايم(ن) يلتجيله
"
الذال-ذرف الدمع مارجّع الـميت
ولارجعه كـثر التمني ( وَيَا ليت )
كانـك تـعزه ادعْ له كـل ممسيت
قبل ان يجي يومك وتصبح مثيله
"
الرا_ رفيقك لا تباطى اتصل فيه
اسأل عـليه ، ولا تـفـكّـر تجـافـيه
عذره معه لو ماكشف لك خوافيه
الله عـليم بـما ف صـدره يـشيله
"
الزا_ زعـلك وصدتـك مابها خـير
مأمن ورآها كود كثر الـمخاسير
خل الزعل وانس السهر والمعاذير
وعـش الـسنين الـمقبلات الـقليله
"
السين_ سهم(ن) بـالتسرع رميـته
خـسارتـه مـثل الـهدف لا خـطـيته
لا تـهدم اللي فـي سنين(ن) بنيته
مامن ورى بعض التسرّع فضيله
"
الشين_ شـاور مـن يـعزك ويغليك
قـبل الـندم يذبح طموحك ويـنهيك
الـرأي رأيـك لـكـن الـشور يـحْيِـك
ومن يزرع اثماره بيجني حـصيله
"
الصاد\صبرك عالمصايب يـثـيبك
وعدٍ مـن الرحمن ربـي ، حسيبك
لاشك خِـيره كل حكم(ن) يصيبك
ومـن يـتـبع إيـمانـه بـيلقى دلـيله
"
الضاد/ضحك اعداك لا يستفزّك
خلـك رزيـن (وريـحهـم) لا تـهـزّك
وإبـليس مـلـعون الـثوى لا يـدزك
عـلى الـردى ولّا الـعلـوم الـهزيـله
"
الطا_طويل الباع خلك على طول
وان ضاقت الدنيا فردد ب لاحول
الله كـريم ويـرزق الـعـبد ب قبول
لاصـار عبده ساجد ومنحني لـه
"
الظا/ظروف الـوقت لا تـكسرك قم
كـل(ن) له ظروفه وكـل(ن) وبه هم
مادام لك ظهر(ن) وعندك بني عم
وقّـف بـوجه ظـروفـك الـمستـحيله
"
العين_ عُـملات الـبشر مـا تـشابه
احذر مـن الـلي بـارز(ن) فيه نابه
(ان لـم تـكن ذئـباً كـلتك الـذيـابه)
مـأكل رجـل(ن) يـسمعك تشتكيله
"
الغين_ غـلطات الـكـفو لا تـغـيّرك
وقـف وقـلّـه كـان عـلـمه مـحـيّـرك
لاتـجعل اهـروج العواذل تـسيّرك
مـادام يـعـني لـك لـزوم اتـعـنـيله
"
ألفا_ فـعول الـطيب فينا طـبـيـعه
مـن خـلـفها لاتـرتـجي لك وديـعه
من يفعل المعروف لجل انْ يـبيعه
ماهـو اصـيل ولا فـعـولـه اصـيله
"
القاف-قسمك عند رب القسومي
الـلي كـلامه واضـحٍ وامحسومي
ما يـاخـذه غـيـرك ولـوّه ظـلـومـي
مـكـتـوب ومـقـدّر ولا فـيـه حـيِـلـه
"
الكاف/ كـثر حكاك عـيبٍ ومنقود
والصمت هيبه والفعل يرفعك زود
واخص لاصارت هروجك بلا فود
هرج(ن) بليا افـعلو محدٍ يـكـيله
"
اللام_ لاتحكم من اللي يقولون
ياكثر مـنهم بالهروج ايـتسلون
لاصار ماشفت بعيونك ولا لون
لاتتبع الناقص ولا أهل الرذيله
"
الميم_ مالك والسوالف والاحراج
وادروب ما يـنفّع عـليها الـتدوّاج
افـلان سوّى وقال وفلان محتاج
ابتلشت منهو كل يوم اتحكي له
"
النُّون_ نـوم الـعبد خير وعباده
يكفيك عـن وجـهٍ يجيب النكاده
ولّا السهر مامن وراه استفاده
بخيل وطـيوف الـحبايب بـخيله
"
الها_هـقيت ان الـمقـفّي يـعـوّد
وضليت في حبل الأمل امتجوّد
والحين شفني راضيٍ وامـتعوّد
مافادني صبري وكثر اتعبي له
"
الواو_ واجه كل مـن يـطلبك حق
لاتتبع اللي لا اطلبوه العرب طق
اللي يـسكّـر هاتـفـه كـل مـا دق
وصفاته ابعكس الصفات النبيله
"
اليا_ يـعرف اللي بـلاه الـزمـاني
قصدي وكل اللي نطق به لساني
هـذا واصلي عـالـنـبـي الـيماني
إعداد ما سامح خـليل(ن) خـليله.