#ابو سيف الخالدي بانقور ١٤٣٧هجري

الشاعر أمس في راس مذروبٍ رقيت

يشحن اللي مع الغربة رقاه

ولا عوى الذيب في جنبي عويت

حزن والذيب من جوعٍ عواه

وكلّ ما هبّ ذعذاعٍ بكيت

ولا يلام المولّع في بكاه

والمغنّي ليا غنّى ببيت

وسّع البال مع رنّة غناه

والله اني شليّ وقد سليت

لكن القلب مدري وش بلاه

كلّ ما زلّ لي حلّ و نسيت

يذكر القلب شيٍ قد نساه

وكل ما قلت من همّي بريت

عوّد القلب في دورة عناه

كمّ ليلة على شانك سريت

واسود الليل يتعب من سراه

اطلب النوم في وقت المبيت

واتشفق يجي عيني كراه

والله انك على بالي طريت

يوم ريح المطر جابه هواه

ليتني عن خبركم ما دريت

وليت راع النبا ضيّع نباه

وليتني في طريقك ما مشيت

والهوى دايماً تتعب خطاه

من بنى له من الأحلام بيت

لا توقّظ هدم بيتٍ بناه

والله اني على العليا ربيت

بين إمارة عُنيزة والحصاة

لكن الحب في قلبي يبيت

والرجل فعله لقلبه مرآه

وعيبي اني عطيت ولا خذيت

وفالهوى من عطا شيٍ خذاه


ابو سيف الخالدي بانقور
١٤٣٧هجري