الشاعر / عبدالرحمن بن سعد

بدر بن دهام #شعراء_بني_خالد

طال الطويل وطوّل البعد ياسيف

وتمغّطت دون البلاد المسافة

ما قلتها مِنّة ولا هي تحاسيف

ولانيب من قوم المنن والحسافة
حنا بني خالد هل البَرَّ والسِّيِف

وحدودنا مكة وشرق الرصافة
يخضع لنا العمران والحِدِب والرّيف

أما خضع من حبّ والا مخافة

منزالنا جنّة هَجَرْ حزّة الصيف

ووقت الحيا ناخذ على الارض طافة

نحفظ حقوق الجار ونعشّي الضيف
ونحطّ لسباع الفيافي ضيافة
حنا بني خالد هل الرمح والسيف
حرّابنا مهما بلغ ما نخافه

اسيوفنا حدبٍ طوالٍ مراهيف

والسيف مدحه طولته والرهافة

نودع بها جمعة عدانا نتاتيف

ونسحق تجمّعهم ونمحى الكثافة
كم فرّقت بين القلوب المواليف

وكم طوّعت عاصي بليّا ولافة

ومن لا يطاوعنا على الشّفّ والكيف
نقضي على عمره بليّا كلافة
ما طالنا ظلمٍ ولا مرّنا حيف
سلطاننا في الارض مثل الخلافة

ما فيه زلّة في كلامي ولا زيف

ولانيب احدّث من حديث الخرافة
ما دام تاريخ البشر دون تحريف (وعيب المؤلف ميلته وانحرافه)

تلقى كلامي واضحٍ دون تصحيف
ماهوب مثل اللي كتب في الصحافة

ابو سيف الخالدي
بانقور
١٤٣٧/٩/٤ هجري