الدين لدروب الكرامه مهو عيب / الشاعر تيسير الدرعان

بدر بن دهام  الدين لدروب الكرامه مهو عيب
.العيب قصر ايديك عن واجباتك

إلا انحر القعدان وقت المواجيب
.والله يجمل سيرتك في حياتك

ألرجل بخله من كبار العذاريب
.وريال ضيفك مايسبب غناتك

اصرف على الضيفان ماحاشت الجيب
.وإياك تقصر يا( محمد) عطاتك

ربعك بني عمك عراض المناكيب
.من قبل تولد ياولد لي مماتك

احرص على ربعك وخلك كما الذيب
.بالطيب قسمك من ماعليق شاتك

هذي وصات اللي خذته التجاريب
.ضيفك ثباتك ياولد في شتاتك

اتعب على كسب الثنى والمناقيب
.وعن الكرم لياك يكثر سباتك

اعرض عن الاقوال مخطي أو مصيب
.كثر السوالف تنزلك عن سماتك

سمت الولد يخلصه بالنواشيب
.انصحك خله يابعدي من صفاتك

كثر على سمع الرجال التراحيب
.الضيف فرصه يا (محمد) وجاتك

خلك عليهم من خيار المعازيب
.وسابق من يحاول يسوي سواتك

واول دروب الطيب ياراعي الطيب
.أمك وخيك.. وألفخر في خواتك

وأهم من هذا حياة النواصيب
.ما شي ينفع لا قصرت بصلاتك

ماغيرها يمنع سموم الواهيب
.هوايل(ن) فيها صلاتك نجاتك

في يوم تكثر به عليك المطاليب
.الذنب يدمح مع كثير حسناتك


ادري سنينك (خمس) ماجيت للشيب
.والله يمدد بالصلاح سنواتك

وفي يوم لا منك قريت المكاتيب
.إن كنت في قبري رجاي ادعواتك

وان كنت عايش في مهب الذواهيب
.احسب حسابك في ملافظ شفاتك

وأحفظ عليك الصافيه بالمشاريب
.حذرى يكون فراقها لك مناتك

وأختامها باأخلي العمر للغيب
.ولا أشتد عودك لا تضيع وصاتك

: تيسير محمد الدرعان الخالدي
صباح الثلاثاء
1437/5/21